Preguntanan Frekuente

E florin karibense ta método legal di pago entrante 31 di mart 2025

E monedanan di florin karibense tin e siguiente denominashonnan: 5 florin, 1 florin, 50 sèn, 25 sèn, 10 sèn, 5 sèn i 1 sèn.

Pa biyete, e denominashonnan lo ta 200 florin, 100 florin, 50 florin, 20 florin i 10 florin.

E Cg200 a bini na lugá di e papel di NAf. 250 florin i e Cg20 a bini na lugá di e papel di NAf. 25.

E denominashonnan nobo akí pa biyete ta pas mihó ku loke bo ta topa generalmente den e sistemanan di pago internashonal, por ehèmpel di euro i dòler.

E símbolo di e moneda di florin karibense ta Cg.

E kódigo ofisial den sistemanan di pago ta XCG. Motibu pa esaki ta ku e kódigo ISO ofisial di moneda pa mas di un pais (kual ta e kaso pa Kòrsou i Sint Maarten), semper ta kuminsá ku un 'X'. 

Pa florin antiano a usa NAf komo símbolo di e moneda. E kódigo di moneda ofisial pa florin antiano ta ANG.

Pa motibunan logístiko, no ta posibel pa tur banko komersial a suministrá tur ATM ku florin Karibense riba 31 di mart 2025. Nan lo yena e mashinnan gradualmente durante luna di aprel.

Lo aseptá pago ku florin antiano te ku 3 luna despues di introdukshon di florin karibense riba 31 di mart 2025. Esaki ta nifiká ku por hasi pago kèsh den NAf. te ku 30 di yüni 2025. Lo bo risibí kambio (prinsipalmente) den florin karibense.

E dos monedanan lo ta den ko-sirkulashon pa tres luna for di 31 di mart 2025.

Den prinsipio no mester ninga florin Antiano, ya ku e ta moneda legal ainda te ku 30 di yüni. Sinembargo, un empresario mes por disidí kon e ke risibí pago. CBCS no por obligá un empresario of institushon pa keda aseptá florin Antiano entre luna di aprel i fin di yüni. 

Riba e página akí bo por lesa mas tokante e elementonan di seguridat di e biyetenan di florin karibense.

E biyetenan di Florin Karibense tin un kantidat di karakterístika ku ta asistí persona ku limitashon di bista, pa rekonosé e diferente denominashonnan. E karakterístikanan di aksesibilidat ku tin riba e biyetenan ta inkluí: 

Markanan tokabel. Tin strepi elevá na e rantnan na man robes i drechi di e biyetenan parti dilanti. Por distinguí e denominashonnan via di e kantidat di strepi.  

Number grandi. E diseñonan tin number grandi pa klaramente mustra e denominashon. E numbernan grandi tin enk elevá tambe pa fásilmente identifiká e balor di e biyete.

Koló briante. Tur biyete tin un koló dominante.

Enk elevá na banda dilanti di e biyete, kual por mira riba e denominashon, e palabranan 'centrale bank van curaçao en sint maarten', e firmanan, e teksto 'wettig betaalmiddel', fecha di publikashon i e bestia di laman.

Florin karibense ta mará legalmente na dòler merikano ku un tasa di kambio fiho di US$ 1 = 1,79.

E tasa di kambio di florin di Antia Hulandes pa florin karibense ta 1:1. Balor di florin di Antia Hulandes ta igual na di florin karibense.

Por hasi kambio na e banko komersial ku bo tin kuenta bankario serka dje te ku 12 luna despues di introdukshon di florin karibenese. Esaki ta nifiká ku 31 di mart 2026 ta e último dia pa kambia ANG na bankonan komersial.

Sin embargo, despues di e 12 lunanan akí, bo por kambia bo florin antiano ainda na CBCS pa un periodo di 29 aña - te ku 31 di mart 2055.

Por fabor tira un bista riba e página akí tokante e prosedimentu di kambio pa mas informashon.

Sèn NAf ku ta riba bo kuentanan di banko lo wòrdu kambiá outomátikamente na florin karibense sin niun gastu. Un konsumidó lo por tin ku paga gastu si su banko komersial kobra pa kambia òf depositá sèn NAf despues di e fecha di introdukshon. Sin embargo, e gastunan ei no tin keber ku introdukshon di florin karibense. Mas bien, nan ta parti di e gastunan atministrativo ku banko komersial ta kobra.

Si bo no tin un kuenta di banko na un banko komersial, bo por kambia bo florin antiano na CBCS pa un periodo di 30 aña - te ku 31 di mart 2055. Por fabor tira un bista riba e página akí tokante e prosedimentu di kambio pa mas informashon.

Kambio te NAf 2,500, ta posibel un biaha sin sita. Pa kambio di montante mas haltu ku NAf 2,500 òf pa hasi kambio pa di dos biaha, ta nesesario pa traha un sita. Por kambia florin antiano na CBCS te ku 31 di mart 2055. Por fabor tira un bista riba e página akí pa mas informashon tokante e prosedimentu di kambio.

Ta posibel pa kambia sèn pa bo mes, pa otro hende òf pa un kompania. Pa esei, bishitá e página akí: https://www.centralbank.cw/exchange-request

Riba 10 di òktober 2010, Kòrsou i Sint Maarten a bira pais outónomo den Reino Hulandes. E paisnan a forma un union monetario ku un banko sentral i un moneda nobo komun. Den e ‘Regeling Gemeenschappelijk Geldstelsel Curaçao en Sint Maarten’, ku ta regla e moneda ku e union monetario di e dos paisnan akí ta usa, ta stipulá ku florin karibense (Cg) ta bini na lugá di florin di Antia Hulandes (NAf.).

E nòmber florin karibense ta stipulá den e 'Regeling Gemeenschappelijk Geldstelsel Curaçao en Sint Maarten'. Inisialmente, a akordá e nòmber 'Florin Karibe Hulandes'. Pero, komo ku Karibe Hulandes geográfikamente ta inkluí islanan BES i Aruba, a skohe pa e nòmber 'Florin Karibense' den e areglonan akí.

Un di e bentahanan di e florin karibense nobo ta ku - dor di e diseño sofistiká i e karakterístikanan di seguridat modèrno i di kalidat haltu - e biyete- i monedanan ta sigurá kontra falsifikashon. Esaki ta limitá e probabilidat pa froude òf pèrdida ora di usa sèn kèsh.

Royal Canadian Mint a produsí i entregá e monedanan i Crane Currency a imprimí i entregá e biyetenan.

E biyetenan ta di katuna, pero di kalidat duradero. Esei ta nifiká ku e biyetenan di florin karibense lo keda bon mas tempu i, p’esei, e kantidat di biyete ku mester produsí atraves di tempu lo ta ménos. Debí ku lo tin un bahada den tantu produkshon komo destrukshon di biyete, uso di e papel duradero akí lo kontribuí na un medioambiente mas limpi.

E derecho di outor ta den man di Centrale Bank van Curaçao en Sint Maarten.

CBCS ta enkargá ku diseño di e moneda i ta CBCS tin ku laga imprimí e biyetenan. Diseño i produkshon di e monedanan di diferente denominashon tambe ta kai bou di CBCS su responsabilidat.

E diseño i spesifikashonnan di e monedanan ta deskribí den artíkulo 9 i 10 di Regeling Gemeenschappelijk Geldstelsel Curaçao en Sint Maarten. CBCS mes lo determiná ki material lo usa pa produsí e monedanan, i lo disidí tambe nan peso, midí i kantidat.

Mester sigui produsí moneda i plaka di papel ya ku, manera investigashon a mustra, ainda tin hopi hende na Kòrsou i Sint Maarten ku ta paga ku sèn kèsh so. E ekonomianan di e dos paisnan akí ta funshoná prinsipalmente a base di sèn kèsh. Esaki tin di aber entre otro ku ‘inklushon finansiero’, ya ku ainda tin hende ku no tin nan mes kuenta di banko. Pa mas informashon statístiko, klek aki.

Fuera di esei, plaka kèsh ta keda importante ya ku e ta e medio di pago legal i por us’é na tur momento komo medio di pago. Ademas, plaka kèsh ta un alternativa ideal na momento ku koriente i/òf Internèt kai afó i den kaso di desaster natural, ora ku servisio di banko digital i pago digital no ta disponibel.

A kalkulá ku diseño i produkshon di florin karibense lo kosta aproksimadamente NAf 15 mion. E suma akí ta inkluí produkshon di moneda i biyete pa remplasá plaka NAf ku ta den sirkulashon aktualmente i pa por tin un stòk sufisiente pa e promé kuater añanan. E gastunan akí ta pa kuenta di CBCS.