Preguntanan frekuente

Hoofdlijnenakkoord Resolushon Ennia ta un akuerdo firmá entre Centrale Bank van Curaçao en Sint Maarten (CBCS) i e gobièrnunan di Pais Kòrsou i Pais Sint Maarten (di awor padilanti: ‘e Paisnan’) dia 11 di aprel 2024 pa solushoná e problemanan finansiero di ENNIA, na interes di e doñonan di pólisa i demas kreditornan di Grupo ENNIA. Dia 10 di òktober 2024, e partidonan akí a firma un addendum ku algun palabrashon adishonal pa fiha sierto detaye adishonal di Hoofdlijnenakkoord. E solushon akí ta kai bou di e mandato ku CBCS a risibí pa restrukturá Grupo ENNIA a base di e outorisashon ku Korte di Promé Instansia di Kòrsou a emití dia 4 di yüli 2018, i a base di Landsverordening toezicht verzekeringsbedrijf.

Hoofdlijnenakkoord a hiba na e siguiente kambionan den struktura hurídiko di ENNIA ku a drenta na vigor dia 1 di yanüari 2025:

• E entidat nobo ENNIA Holding N.V. ta na kabes di un grupo nobo di kompania di seguro;
• E entidatnan eksistente ENNIA Caribe Schade N.V. i ENNIA Caribe Zorg N.V. ta parti di e grupo nobo akí;
• ENNIA Leven N.V. ta un entidat nobo ku tambe ta forma parti di e grupo nobo. E kompania di seguro eksistente VELIA N.V. (ántes: ENNIA Caribe Leven N.V.) a pasa parti di su obligashonnan di seguro pa e entidat nobo ENNIA Leven N.V. E kompania VELIA N.V. lo keda bou di e areglo di emergensia.

Pa finansiá e resolushon di Grupo ENNIA, kada aña CBCS i e Paisnan lo hasi un aporte finansiero. CBCS, e Paisnan i e kompanianan en kuestion a sera akuerdo di finansiamentu apart tokante esei.

Inisio di e grupo nobo di seguro ENNIA dia 1 di yanüari 2025 ta un paso importante den implementashon di Resolushon ENNIA. Awor, e restrukturashon hurídiko ta tras di lomba.

Tin mas kambio importante na kaminda den kuadro di Resolushon ENNIA. Entre otro, CBCS, den kolaborashon ku hunta di maneho di e kompanianan enbolbí, i e reguladó- i gobièrnunan enbolbí, ta studiando e opshonnan pa loke ta trata e kompanianan di ENNIA na Aruba i pa e tereno di Mullet Bay na Sint Maarten.

E Paisnan a komprometé nan mes pa hasi un aporte anual i lo tene kuenta ku esei na momento di traha nan presupuesto anual. Dia 24 di desèmber 2024, ámbos Pais a firma akuerdo, fihando e kontribushon finansiero ku kada Pais lo aportá.

Gobièrnu di ámbos pais ta obligá di kumpli ku e akuerdonan hasí durante henter e periodo palabrá. Esei ta asina asta si bin kambio den e relashonnan den Parlamento òf den gobièrnu. Ademas, e palabrashonnan hasí den Hoofdlijnenakkoord no por ser kambiá sin ku tur partido enbolbí (esta, tantu e Paisnan komo CBCS) bai di akuerdo.

Bo a risibí un karta di ENNIA ku informashon tokante e restrukturashon. Ta bon pa bo lesa e karta akí, e splikashon adishonal i e ‘leeswijzer’ kuidadosamente. Komo doño di pólisa, no tin nada otro ku bo mester hasi na e momento akí. Riba korto plaso, ENNIA lo organisá un enkuentro informativo, kaminda bo mes lo por hasi kualke pregunta adishonal ku bo tin.

Esei ta dependé di kiko bo kondishonnan di pólisa ta bisa. Tuma kontakto ku bo konsehero òf agente di seguro pa mas informashon.

Den kuadro di e restrukturashon hurídiko, a splet algun di e pólisanan di seguro den dos pólisa apart. Di akuerdo ku Hoofdlijnenakkoord, parti di e portafolio di seguro eksistente ta ser atministrá pa ENNIA Caribe Leven N.V, miéntras ku e otro parti ta sigui bou di e entidat nobo ENNIA Leven N.V. Ku e solushon akí, en prinsipio, no mester redusí loke e doñonan di pólisa tin derecho riba dje. Aki ta sigui un splikashon di ki parti di e portafolio aktual a pasa pa ENNIA Leven N.V. i ki parti a keda bou di VELIA N.V.:

• Si bo tin un pólisa ku bo a sera despues di 4 di yüli 2018, el a pasa pa ENNIA Leven N.V. i lo sigui bou di e entidat ei.
• Si bo tin un pólisa ku ta(bata) den su fase di ‘opbouw’ ainda despues di 4 di yüli 2018 (esta, si bo a paga prima p’e despues di 4 di yüli 2018), e parti di bo pólisa ku bo a paga prima p’e for di e fecha ei (i e interes akumulá) a pasa pa ENNIA Leven N.V. i lo sigui bou di e entidat ei.
• Si bo tin un pólisa ku a drenta su fase di ‘uitkering’ promé ku 4 di yüli 2018 (esta, si ta promé ku 4 di yüli 2018 so bo a paga prima), bo pólisa (i e interes akumulá) ta keda kompletamente bou di VELIA N.V. i ta e entidat akí lo hasi e pagonan.
• Si bo tin un pólisa ku tabata den su fase di ‘opbouw’ i di ‘uitkering’ despues di 4 di yüli 2018, (por ehèmpel, si bo a baha ku penshun despues di 4 di yüli 2018), e parti di bo pólisa ku bo a paga prima p’e for di e fecha ei (i e interes akumulá) a pasa pa ENNIA Leven N.V. i lo sigui bou di e entidat ei. E parti restante ta keda bou di VELIA N.V.

Hoofdlijnenakkoord no tin efekto riba e kasonan kontra e akshonista di ENNIA, Parman International, òf Sr. Ansary i otronan. ENNIA i CBCS ta, i ta keda, disididu pa kobra daño i perhuisio for di Parman International (i Ansary i otronan).

Nò, un di e puntonan di salida di Hoofdlijnenakkoord ta ku no mester redusí pago di penshun di e klientenan di VELIA N.V.

E Paisnan lo no bira kopropietario di ENNIA bou di e Resolushon.

Ora a fiha aporte di CBCS i e Paisnan, a tene kuenta ku e défisitnan ku aktuario ta premirá pa VELIA N.V., loke lei ta permití CBCS kontribuí, i kuantu di e derechonan di penshun di e doñonan di pólisa di ENNIA ta di Kòrsou i kuantu ta di Sint Maarten.

VELIA N.V. ta keda bou di e areglo di emergensia despues di 1 di yanüari 2025 tambe.

ENNIA Caribe Schade N.V. i ENNIA Caribe Zorg N.V. ta forma parti di e entidat nobo ENNIA Holding N.V. Dia 12 di novèmber 2024, Korte di Promé instansia di Kòrsou a dikta ku for 1 di yanüari 2025, e entidatnan akí lo no ta bou di e areglo di emergensia mas. ENNIA Leven N.V. tampoko no ta bou di e areglo di emergensia.

For di yanüari 2025 padilanti, ta ENNIA Nobo lo manda bo fakturanan di prima. Lo bo risibí bo faktura di ENNIA Leven N.V. pa yanüari i febrüari 2025 den yanüari 2025. Debí na e restrukturashon, e biaha akí e faktura ta sali un poko mas lat ku di kustumber.

ENNIA ta dunando informashon tokante e desaroyonan via karta ofisial. Lo bo a risibí esakinan via e-mail i via pòst den desèmber 2024 i yanüari 2025. E kartanan akí ta bini di ENNIA mes, di bo broker i/òf di bo dunadó di trabou. Fuera di esei, ENNIA lo organisá mas enkuentro informativo i duna informashon riba tur kambio ku ta importante pa bo, via vários kanal di komunikashon.

For di 1 di yanüari 2025, un di e siguiente situashonnan ta konta pa bo seguro serka VELIA N.V.:

1. Si bo a sera e seguro promé ku 4 di yüli 2018 i e fecha di vensementu ta despues di 4 di yüli 2018 (ku otro palabra, bo seguro a drenta òf por bai drenta e fase di ‘uitkering’):

• E parti di e seguro ku bo a akumulá promé ku 4 di yüli 2018 ta keda (komo un pólisa isplet) bou di VELIA N.V. ENNIA Caribe Leven N.V. lo kumpli kompletamente ku e obligashonnan (di pago), konforme Hoofdlijnenakkoord.
• E parti di e seguro ku a paga prima p’e despues di 4 di yüli 2018 (i e interes akumulá riba e parti ei) a pasa pa ENNIA Leven N.V. komo un pólisa (isplet) i ENNIA Leven N.V. lo sigui atministr’é.

2. Si bo a sera e seguro despues di 4 di yüli 2018:

• Dia 1 di yanüari 2025, e seguronan akí a pasa pa ENNIA Leven N.V. i e kompania ei lo sigui atministrá nan.

A kambia nòmber di e entidat ENNIA Caribe Leven N.V. pa VELIA N.V. pa evitá ku ta konfundí ENNIA Caribe Leven N.V. ku ENNIA Leven N.V.

VELIA N.V. a pasa e akuerdo di fiansa eksistente ku bo a sera kuné pa ENNIA Leven N.V. Esei ta nifiká ku tur derecho i obligashon (derivá) di bo akuerdo eksistente di fiansa tambe a pasa pa ENNIA Leven N.V. Entre otro, esei ta inkluí tur debe pendiente pa kobra, tur obligashon di pago i tur derecho di garantia, inkluyendo derecho di hipotek, ku bo a duna VELIA N.V.

Maneho i atministrashon di bo fiansa hipotekario a pasa pa ENNIA Leven N.V. E traspaso akí no tin niun efekto riba bo fiansa hipotekario, e tarifa di interes ni e kondishonnan.

E finansiamentu riba pólisa ku bo tin aktualmente riba bo akuerdo di seguro serka VELIA N.V. a pasa pa ENNIA Leven N.V. Tur derecho i obligashon a base di bo finansiamentu eksistente riba pólisa, inkluyendo tur kondishon aplikabel na bo finansiamentu, tur debe pendiente pa kobra i tur obligashon di pago a pasa pa ENNIA Leven N.V.

Maneho i atministrashon di bo finansiamentu riba pólisa a pasa pa ENNIA Leven N.V. E traspaso akí no tin niun efekto riba bo finansiamentu, e tarifa di interes ni e kondishonnan.

E restrukturashon no tin niun efekto riba e seguronan di schade i zorg será serka ENNIA Caribe Schade N.V. i ENNIA Caribe Zorg N.V. Pa e seguronan ei, tur kos ta keda meskos.

Na Banco di Caribe (BdC), ENNIA Leven N.V. tin un number di kuenta nobo, esta: 35258901. ENNIA Leven N.V. su number di kuenta na Maduro & Curiel's Bank (MCB) a keda meskos. E numbernan di kuenta di banko aktual i bo último fecha pa paga ta aparesé riba bo faktura mas resien.